افتقد جدى

حبيبي كان موجود فى كل حاجة فى حياتى الحمد لله انه هو كان جدى و انى اتربيت معاه و شفته بيقدم رسالته و غمرت بحبه الله يرحمه

اكتوبر 2015

من ساعة ما وعيت على الدنيا و جدو كان جمبى : هو اللى علمنى اقرا و هو اللى رجعنى اقرا بعد ما كنت فاكرة ان ده سبب نبذى من مجموعة صحابى. هو اللى علمنى اشى مسافات طويلة و احب المشى هو اللى علمنى احب العود عشان كان بيعزفه و يخلينى اغنى معاه و يسجلى كان هو المشجع الاكبر ليا كان بيقلى انى فنانة و بعرف اغنى بصرف النظر عن انه شايف انى مينفعش اكتب او اعمل اى حاجة ليها علاقة بسرد احداث او راى او خبرة لانى ننوسة صغيرة زى ما بيقول.
و انا صغيرة كانت فسحتنا المنشية لغاية دلوقتى كل الناس تعرفنى هناك و كل ما بدخل محل جتى فى اديق زقاق يقولولى وصليلنا السلام للحاج محمد. بيمشى رافع راسه على طول حتى بعد ما تعب و تيتا بقت تصمم تنزل معاه عشان تسنده لو جرا حاجة يقلها امشى ورايا و يرفع راسه وكانه اصغر منى ما شاء الله. امبارح انا كنت تعبانة اوى و عرف انى نازلة اجيب ادوات الكلية سرب تيتا و صمم ينزل معايا زى ايام ما كنت صغيرة و دخلنا فى كل زقاق و وقفنا نتكلم مع البياعين اللى بيحبهم و افتكرت لما و انا فى ابتدائى كان شايللى قلم دهب و كشاكيل حلوة يقلى دول لكليتك عشان لما امشى تلاقيهم من بعدى و بعدين احنا الاتنين لقينا ان احنا كبرنا سوا و لسة مع بعض مرضيتش اخد الحاجات منه عشان انا لسة صغيرة برضو و روحنا و قالى انه فخور بيا و نزلنى باقلام كتير و قالى اوعى حد من زمايلك فى الكلية يضحك عليكى و ياخد اقلامك .
مفيش درس من ده فيه بس انه الدنيا بالنسبالى على الاقل بتكون حقيقية لما بلمس اللى بحبهم لما بعمل اللى بحبه ده اللى بيدينى الثقة 
 اللى بتخلينى اكمل السلم حتى لو كانت الدنيا ضلمة